•أحمد عز الفنان الناجح وصل للنجومية في وقت قصير, حدثنا عن ذلك؟

ولا حاجه.. إلا انى اجتهدت فى عملى.. أنا عاشق لهذا العمل لان الفن بالنسبة لي عملي المفضل وليس لمجرد الشهرة والنجومية.. الفن بالنسبة لي رموز.. الفن يعنى عبد الوهاب يعنى عبد الحليم يعنى وصولي لرمز من هؤلاء الرموز. وأنا لا أمثل لمجرد التواجد في الساحة وتطويري لنفسي هو الذي صنع نجوميتى.

 

 

·       ونحن في عام 2013.. كم بالمائة حققت من أحلامك من بداية ظهورك حتى هذا العام؟

جزء كبير جداً من أحلامي لم يتحقق بعد.. كم أتمنى أن أقوم بعمل أفلام أهم وتواكب أحداث مصر وأفلام تعرض خارج مصر  وجائزة can.

 

·       لكل فنان "جروب" يفضل العمل معه.. ماذا عن أحمد عز؟

بالعكس, اختيار الأبطال في أفلامي تكون باستشارة مع المخرج, وهو من يستطيع أن يحدد الأنسب لكل دور, وأنا شخصيا "مش بفضل جروب معين لأن كل دور ينادى صاحبه".

 

·       ما سبب توجهك في أكثر من فيلم للبطولة الثنائية؟

"مش بحسبها كده", الصحافة دائماً تقول بطولة ثنائية, لكننا نقدر ماذا نحتاج لعمل فيلم  يرضى الجمهور بأبطال مناسبة لكل فيلم.

·       هل تريد تكرار الوقوف أمام نجم كبير مثل الفنان نور الشريف؟

يحكمني السيناريو, لو تكررت فهذا شرف لي مثل فيلم "مسجون ترانزيت", السيناريو هو إلى قال المجاملات والأصحاب خارج نطاق الفن والعمل أنا عسكري في أعمالي والفيلم وتصويره هو المعسكر بالنسبة لي, "وأنا لا أفضل مشاهده making الأفلام ويكون الواضح للجمهور الهزار والرقص والضحك لأن الفنان يعمل كثيرا", "وهدفى انى لما أعمل أفلام تفضل معلمه مع الناس زى "ملاكى اسكندرية" تقدرى تشوفيه لحد دلوقتى".

 

·       ما نصيحتك للوجوه الجديدة لكي تصل لنجومية أحمد عز؟

"لو عندى أولاد هنصحهم يختارو مهنه تانية لأن التمثيل صعب", لو أن الوجوه الجديدة تعتقد أن التمثيل شهرة ونجومية فقط فهذه مشكلة, لأن الفنان يبذل مجهودا كبيرا, وعليه تقديم أعمال تليق ببلده.

 

·       نجاح أفلامك  يكون من الإيرادات أم من رد فعل الجمهور؟

لا شك أن  الإيرادات جزء منه, ومن وجهة نظري هناك أفلام تحقق إيرادات عالية, ولكنى كأحمد عز أركز كثيرا فى مدى بقاء الفيلم بين الجمهور كأفلام الفنان القدير رشدي أباظة أشاهدها أن شخصيا حتى الآن.

جاءتني حالة إحباط شديدة بعد نزول فيلم "365 يوم سعادة" في 25 يناير, ولكن بالرغم من توقيته إلا أنه حقق إيرادات عالية. وفيلم "المصلحة" عرض في 25 يناير وحصل على إيرادات عالية أيضا, "والحمد لله الجمهور دايماً جنبى".

 

·       أنت من أكثر الفنانين "وسامة" كيف ترى المعجبات, ولماذا  تأجيل خطوة الارتباط؟

"بحب المعجبات والمعجبين زى ما بيحبونى", ولكن أنا شخص قليل الخروج إلا فى أوقات التصوير, أما الارتباط "لازم دماغي تتملى مش بس عشان ارتبط لا أنا محتاج شريكه حياه ذكيه أهم حاجه الذكاء لازم تكون مقبوله شكلاً بس مش مخبوله عقلاً لأن أنا متعب جداً وطماع وده سبب تأخير ارتباطى".

 

·       ايه أخر أعمالك؟

فى فيلم مع وائل عبد الله وأول ما نحدد اسمه والأبطال هعرفك.

 

·       مفكرتش تكرر أعمال التلفيزيون؟

كنت داخل مسلسل جديد اسمه مولانا بس كانت الشخصيات ديه موجود منها مسلسلات كتيره وأنا بحب أكون مختلف والتلفزيون بالمناسبه أصعب من السيما وأخطر لأن الريموت هى الى يتحكم فيك وفشلك فى التليفزيون هيأثر فى السينما

وأنا أكره المسلسلات التركى وأنشغال ناس كتير أنا أوافق على فكرة عرض المسلسلات دى على قنواتنا لو كانت مسلسلاتنا تتعرض هناك.

 

·       عندك أصدقاء من الوسط الفنى؟

كل الى اشتغلت معاهم أصحابى بس أحمد السقا من أقرب الناس وأهله هما أهلى وليا أصحاب كتير هنا فى المعادى وجيرانى.

 

·       لو كنت فى الزمن القديم للفن تمثل أدام مين؟

فنانات طبعاً ناديه لطفى وفاتن حمامه وسعاد حسنى وهند رستم الفنانين رشدى أباظه لأنه بيعرف يمثل كل الأدوار الباشا والصعيدى والفلاح الممثل الناجح بيعرف يتلون فى الأدوار.

 

·       دورك فى فيلم المصلحه كنت واثق من نجاحه؟

الحمد لله جداً المفروض الناس متحكمش غير لما تشوف الأول أما أول ما لبست اللبس والخاتم حسيت الدور وطلعت منى كده والحمد لله نجح وشكلى ده أبويا وأمى جابونى كده ولكن شخصيتى زى أى حد وان شاء الله أعمل أبعد من كده كمان.

 

·       هل فكرت في الاعتزال؟

أنا بحب الفن جداً مفكرتش أعمل مشروع لأن أنا مش بكنز فلوس أنا ممثل ودى شغلتى ومن غير أفلام وتصوير بحس ان أنا شخبطه.

 

·       هقولك كلمه وترد عليها بجمله من جواك؟

• الفن: طموحى وبدعى ربنا انى أعلى بالفن.

• رشدى أباظه: قدوه.

• ساندرا نشات: سكنى وبيتى.

• ايناس الدغيدى: صاحبه فضل جابتنى من بيتنا عملتنى بطل.

•يسرا: مفيش زيها.

• مصر: ربنا يستر.

 

·       متوقع ايه لمصر؟

أنا بتمنى ليها الخير مصرعيانه .. مصر وحشتنى أنا مش مرتاح.

 

·       حاسس دلوقتى أفضل والا أخر 30 سنه مصر عاشنهم؟

منقدرش نقول 30 سنه ممكن تقول أخر 10 سنين وبعدين ولا ده ولا ده زمان كان فى أمان.

لازم نفكر فى بعض كمصريين قبل ما نفكر في الحكم والكرسي مصر هاينه علينا أوى.

 

·       أحمد عز مع أم ضد حكم الأخوان؟

لم أختر محمد مرسى لأنى كنت متخوفا من الأخوان وتفكيرهم, ولكن محمد مرسى رئيس شرعي منتخب علينا أن ندعمه, "أنا زعلان على البلد الناس تعبت ونسبة بيع الأدوية زادت وفى أدوية مش متوفرة, وده حصل معايا شخصياً وحاله الشوارع والمرور". لا تتحدثوا كثيرا عن الكرسى "الحقوا مصر".

"وأنا بعمل دعوة ياريت كلنا كفنانين نعمل دعوه من شرم الشيخ والغردقة لتنشيط السياحة, لأن السياحه مش حرام ومفيش دين جديد نزل وأنا مباخدشى اسلامى ودينى من شخص ممكن أكون أنا زيه أو أفضل منه عند ربنا محدش معاه صك الدين أنا دينى فى قرآنى والسنه كفايه كده تقى حبوا مصر شويه مصر بتغرق".


أضف تعليق


كود امني
تحديث